పర్యావరణ పరిరక్షణలో ప్రతి ఒక్కరూ భాగస్వాములు కావాలి: ప్రభుత్వ విప్ ఎమ్మెల్యే వేముల వీరేశం.

• నకిరేకల్ నియోజకవర్గంలో ఘనంగా వనమహోత్సవం.
• పర్యావరణ పరిరక్షణలో ప్రతి ఒక్కరూ భాగస్వాములు కావాలి: ప్రభుత్వ విప్ ఎమ్మెల్యే వేముల వీరేశం.
• రాహుల్ గాంధీ జన్మదిన వేడుకల్లో పాల్గొన్న ఎమ్మెల్యే.
• 75 మంది లబ్ధిదారులకు కల్యాణ లక్ష్మి చెక్కుల పంపిణీ.

మొక్కలు నాటుతున్న ఎమ్మెల్యే వేముల వీరేశం

యాదాద్రి భువనగిరి, జూన్ 19 (నమస్తే న్యూస్): రాష్ట్ర ప్రభుత్వం ప్రతిష్టాత్మకంగా నిర్వహిస్తున్న వనమహోత్సవ కార్యక్రమాల్లో భాగంగా ప్రభుత్వ విప్, నకిరేకల్ ఎమ్మెల్యే వేముల వీరేశం నియోజకవర్గంలోని పలు మండలాలు, పట్టణాల్లో విస్తృతంగా పర్యటించి మొక్కలు నాటారు. నకిరేకల్ పట్టణ ప్రభుత్వ ఆసుపత్రి, కేతపల్లి, కట్టంగూర్, నార్కట్‌పల్లి, రామన్నపేట మండల కేంద్రాల్లో నిర్వహించిన కార్యక్రమాల్లో పాల్గొన్న ఆయన పర్యావరణ పరిరక్షణపై ప్రజలకు అవగాహన కల్పించారు.

ఈ సందర్భంగా ఎమ్మెల్యే వీరేశం మాట్లాడుతూ, ముఖ్యమంత్రి అనుముల రేవంత్ రెడ్డి నాయకత్వంలో రాష్ట్ర ప్రభుత్వం "హరిత తెలంగాణ" లక్ష్యంతో విస్తృతంగా మొక్కల పెంపకం కార్యక్రమాలు చేపడుతోందని తెలిపారు. గ్రామాలు, పట్టణాలు పచ్చదనంతో కళకళలాడేలా ప్రభుత్వం ప్రత్యేక కార్యాచరణ అమలు చేస్తోందన్నారు. పెరుగుతున్న కాలుష్యం, వాతావరణ మార్పులు, భూగర్భ జలాల తగ్గుదల వంటి సమస్యలను అధిగమించేందుకు ప్రతి ఒక్కరూ మొక్కలు నాటి వాటిని సంరక్షించాలని పిలుపునిచ్చారు.

మొక్కలు మనిషి మనుగడకు ఆధారమని, భావితరాలకు ఆరోగ్యకరమైన వాతావరణాన్ని అందించాలంటే చెట్ల పెంపకం అత్యంత అవసరమని పేర్కొన్నారు. వనమహోత్సవాన్ని కేవలం ఒకరోజు కార్యక్రమంగా కాకుండా నిరంతర ప్రక్రియగా కొనసాగించాలని సూచించారు.

రాహుల్ గాంధీ జన్మదిన వేడుకల్లో పాల్గొన్న ఎమ్మెల్యే.

రాహుల్ గాంధీ జన్మదినం సందర్భంగా కేక్ కట్ చేస్తున్న ఎమ్మెల్యే

కేతపల్లి, రామన్నపేట మండల కేంద్రాల్లో నిర్వహించిన కాంగ్రెస్ అగ్రనేత రాహుల్ గాంధీ జన్మదిన వేడుకల్లో ఎమ్మెల్యే వీరేశం పాల్గొని కేక్ కట్ చేసి శుభాకాంక్షలు తెలిపారు. ఈ సందర్భంగా విద్యార్థులకు పుస్తకాలు, నోట్‌బుక్స్ పంపిణీ చేశారు.

విద్యార్థులే దేశ భవిష్యత్తని పేర్కొన్న ఆయన, ప్రతి విద్యార్థి ఒక మొక్కను నాటి దాన్ని సంరక్షించాలని సూచించారు. ప్రభుత్వ పాఠశాలల్లో నాణ్యమైన విద్య, మెరుగైన మౌలిక వసతుల కల్పనకు రాష్ట్ర ప్రభుత్వం కట్టుబడి ఉందన్నారు. యువత ఉన్నత లక్ష్యాలతో ముందుకు సాగి సమాజ అభివృద్ధిలో భాగస్వాములు కావాలని ఆకాంక్షించారు.

విద్యార్థులకు నోటు పుస్తకాలను అందజేస్తున్న  ఎమ్మెల్యే వేముల వీరేశం

75 మంది లబ్ధిదారులకు కల్యాణ లక్ష్మి చెక్కుల పంపిణీ.

లబ్దిదారులకు చెక్కులను అందిస్తున్న ఎమ్మెల్యే వేముల వీరేశం

కట్టంగూర్ మండల కేంద్రంలో వనమహోత్సవ కార్యక్రమం అనంతరం 75 మంది లబ్ధిదారులకు కల్యాణ లక్ష్మి చెక్కులను ఎమ్మెల్యే పంపిణీ చేశారు. పేద కుటుంబాల ఆర్థిక భారం తగ్గించేందుకు రాష్ట్ర ప్రభుత్వం అనేక సంక్షేమ పథకాలను అమలు చేస్తోందని తెలిపారు. పేదింటి ఆడబిడ్డల వివాహాలకు ఆర్థిక అండగా నిలుస్తున్న కల్యాణ లక్ష్మి పథకం ఎంతో ఉపయోగకరంగా మారిందన్నారు.అర్హులైన ప్రతి కుటుంబానికి ప్రభుత్వ సంక్షేమ పథకాలు చేరేలా అధికారులు కృషి చేయాలని సూచించిన ఎమ్మెల్యే, ప్రజా సంక్షేమమే రాష్ట్ర ప్రభుత్వ ప్రధాన లక్ష్యమని పేర్కొన్నారు.ఈ కార్యక్రమాల్లో ప్రజాప్రతినిధులు, అధికారులు, కాంగ్రెస్ పార్టీ నాయకులు, కార్యకర్తలు, ఉపాధ్యాయులు, విద్యార్థులు, మహిళలు, యువకులు, లబ్ధిదారులు మరియు స్థానిక ప్రజలు పెద్ద సంఖ్యలో పాల్గొన్నారు.