కరువుపై ‘జలసిరి’ సమరం
తిరుమలాయపాలెంలో అత్యవసర గ్రామసభలు.
మారిన వాతావరణ పరిస్థితులపై అధికారుల అప్రమత్తత.
తిరుమలాయపాలెం, పిండిప్రోలు, కాకరవాయి, జూపెడ గ్రామాల్లో సర్పంచుల ఆధ్వర్యంలో సభలు.
రైతు ముంగిట్లోకి ఫామ్ పాండ్లు, ఇంకుడు గుంతల అవగాహన.
తిరుమలాయపాలెం జూలై 27( నమస్తే న్యూస్ )
ప్రస్తుతం నెలకొన్న ప్రతికూల వాతావరణ పరిస్థితులు, వర్షాభావ ప్రభావంపై మండల యంత్రాంగం యుద్ధప్రాతిపదికన స్పందించింది. భవిష్యత్తులో సాగు, తాగునీటి సంక్షోభాన్ని ముందే పసిగట్టిన అధికారులు.. ప్రజాప్రతినిధులను అప్రమత్తం చేస్తూ మండల పరిధిలోని పలు కీలక గ్రామాల్లో అత్యవసర గ్రామసభలను నిర్వహించారు. 'జలసిరి' పథకం ద్వారా ప్రతి ఎకరాన్ని పచ్చగా మార్చేందుకు, భూగర్భ జలాలను పటిష్టం చేసేందుకు ఈ సభలు వేదికగా మారాయి.
సర్పంచుల సారథ్యంలో అవగాహన సదస్సులు
మండలంలోని తిరుమలాయపాలెం, పిండిప్రోలు , బీరోలు కాకరవాయి, జూపెడ గ్రామాల్లో ఆయా గ్రామాల సర్పంచుల ఆధ్వర్యంలో ఈ అత్యవసర గ్రామసభలు జరిగాయి. మారుతున్న వాతావరణ పరిస్థితుల వల్ల తలెత్తే నీటి ఎద్దడిని తట్టుకోవడానికి వంద శాతం ఉచిత సబ్సిడీతో నిర్మించే ఫామ్ పాండ్లు (నీటి గుంటలు), ప్రతి ఇంటికీ ఇంకుడు గుంతల ప్రాధాన్యతపై రైతులకు క్షేత్రస్థాయిలో అవగాహన కల్పించారు. వర్షపు నీటిని ఒడిసి పట్టుకోవడం ద్వారానే పొలాలకు జీవం వస్తుందని, ఈ సువర్ణావకాశాన్ని చిన్న, సన్నకారు రైతులందరూ ఉపయోగించుకోవాలని సర్పంచులు పిలుపునిచ్చారు.
యుద్ధప్రాతిపదికన దరఖాస్తుల స్వీకరణ
ప్రభుత్వం ఆగస్టు 15వ తేదీని డెడ్‌లైన్‌గా విధించిన నేపథ్యంలో, గ్రామసభలకు హాజరైన రైతుల నుంచి ఉపాధి హామీ జాబ్ కార్డులు, భూమి వివరాల పరిశీలన ప్రక్రియను వేగవంతం చేశారు. వాతావరణ మార్పుల వల్ల పంటలు ఎండిపోయే ప్రమాదం ఉన్నందున, సొంత పొలంలో ఫామ్ పాండ్ ఉంటే పంటను కాపాడుకోవచ్చని అధికారులు రైతులకు వివరించారు. ఈ గ్రామసభల్లో స్థానిక ప్రజాప్రతినిధులు, గ్రామపంచాయతీ కార్యదర్శులు, వ్యవసాయ, ఉపాధి హామీ క్షేత్రస్థాయి సిబ్బంది మరియు పెద్ద సంఖ్యలో రైతులు పాల్గొని విజయవంతం చేశారు.
